Swachh Bharat ya sentong ka masü maparen ka lir : Nagaland Angh

Swachh BharatDimapur, October 18 (TYO) : Swachh Bharat ya sentong ka masü saka maneni inyakba maparen ka lir ta Nagaland Angh, P. B. Acharya-i ashi.
October 18, 2016 nü Rhododenron Hall, Police Complex Chumukedima nung Swachh Bharat, Dimapur District review meeting nung Angh-i iba onük jembi.
Swachh Bharat nung India nunger kija shia dena lir aser Nagaland nung aser talisa Dimapur nung iba NGO, telok, kija, school, reju aser kiyongtemi iba mapa takok ngua inyakba atema tenüngsang agütsür, ta Angh Acharya-isa ashi.
Prime Minister, Narendra Modi-i school shia nung metsümeshidak anabosa alitsüla ta alizüng ayuba ama Nagaland Bamboo Mission-i school aser kiyong aika nung bamboo toilets yanglutsüba atema tenüngsang agütsür, ta paisa shisem.
Swachh Bharat Dimapur atema brand ambassador ji Publisher & Senior Editor, Nagaland Post, Geoffrey Yaden lir aser pai Angh dang Dimapur District Swachh Bharat züngsemtemi mapa balala inyakba osang metetdaktsü.
Swachh Bharat tetezüji merükmeju lir aser Dimapur District atema iba ya “Clean Dimapur” ta züngshir. Dimapur kübok kiyong balala nung Swachh Bharat Mission kanga dang takok ngua inyakdar aser kobi melii iba indang report ka Angh nem agütsütsü, ta Geoffrey Yaden-isa ashi.
Geoffrey-isa swatchbharatdmp@gmail.com dangi noksatem den osang yoktsü metetdaktsü aser itemji Angh dangi abenba sülen, pai Centre sorkar dangi yoktsü, metetdaktsü.
Prime Minister Modi-i Swachh Bharat indang National Brand Ambassador inyaktsü atema Nagaland Angh Acharya shimba atema pelaba metetdaktsür, ta paisa shisem.
Geoffrey-isa Naga Council Dimapur, colony balala nungi GBs, schools, NGOs aser tangartem arua adenba atema pelaba metetdaktsü.
Tanü senden nung Kachari Tribe Council Nagaland, Dimapur Gorkha Union, Chumukedima Hindu Society, Dimapur Bengali Students Union, AG Higher Secondary School, President All National Kachari Students Union, Tetso College, Young Indian Nagaland Chapter, Chumukedima Area GB Association, Dimapur Gorkha Students Union, Eastern Bible College, Sikh Community Dimapur aser Gorkha Christian Alliance nungertem aden.

You must be logged in to post a comment Login