‘Swachh India’ yimyim kija agibo takok mangutsü: Rahul

Mumbai, April 12 (Agencies): Ato kilonser, Narendra Modi’er “Swachh India” mapatong aija tanü Congress tatong Tir, Rahul Gandhi-i, Swachh India yimyim kija ajanga iba mapatong takok mangutsü, ta ashi.
Tawa Mumbai nung jana intokba tesem, Deonar nung mi adokba ajanga yimti tesem aika menentsüba sülen Rahul Gandhi den Congress lenirtemi iba tesem semdangba sülen osangbenertem den jembidang Rahul-i, “Ni yangi Chembur nung alirtem kar ajuruogo. Nisung kabo ajep. Nisungtem TB tashitak menar. Tanur kabo iba tashitak ajanga süogo. Iba tesem ajanga mopung menenja parnok nem tebilemtsü bener arutsür,” ta ashi.
Tawa Mumbai nung aliba Deonar nung mi ajanga iba tesem nung mokozü aser ‘toxic’ gas ajanga nüburtem timtem ajurua liasü.
Iba kiyong nung ita trok tanur ka asüba sülen par tsüraburtemi, tanurji toxic gas ajanga tangu mesashiteti asü ta tai tongloktsü.
“Swachh India yimyim ayimba ajanga dangbo kecha masütsü. Iba atemaji sentong tejangja nüngdak. Nenoki sentong tejangja adoktsüla,” ta Gandhi-i ashi.
Paisa, “Swachh India” yimyim ayimba aser linük merükteta ayuba naji balala lir, ta ashi.
“Ajisüaka tia maka kaji- India koma merükteta alitsü, iba atema mangdang aser sentong mali ama reprangteter,” ta paisa ashi.
Iba tesem shibangtsütsüla ta shia Rahul-i,” Ato kilonser aser Chief minister-i tangsa langka inyaktsüla. Iba yimti, Mumbai ya terenlok temaitsü ka lir,” ta ashi.
Chembur Citizens’ Forum tenüng nung Joint Secretary, S Balakrishnan-i Rahul Gandhi ajurua jana intokba tesem ya shibangtsütsü aser iba tesem nung bendenba jana ton million 12 intoktsü atema scientific lenmang ka bushitsü atema takhangba agütsü.
Tanü Rahul Gandhi-i iba tesem semdangdang pa den Mumbai Congress tongti, Sanjay Nirupam aser BMC nung Opposition lenir, Praveen Chheda nungera liasü.