Swamy-i Finance Minister kümnüba yong Jaitley den rarar: Congress

New Delhi, June 25 (Agencies): Honibarnü Congress Party-i, Subramanian Swamy-i (BJP MP) Union Finance Minister kümner aser pai Finance Minister Arun Jaitley aitsübaji yimjak nung tongbang raraba ka lir, ta ashi.
AICC-i osangbenertem den jembidang taoba mapang Union minister, Prithviraj Chavan-i, “Iba ya asayamenü jilushi ka lir. Brexit (British-i European Union toktsüba) tensa tamajung alidang iba ta tekongshiba tulu ka lir,” ta ashi.
Pai ashiba agi, NSG ken o aliba mapang ka nung External Affairs Ministry lenirtem aser  Finance Ministry den External Affairs Minister longjema alitsüla.
“Ajisüaka asaya menu jilushi ka tang idar aser Ato kilonseri (Modi) Dr. Swamy mazüokteter, mesüra paji kar tetuyuba kübok inyaker. Iba ya Finance minister kümnüsang Dr. Swamy aser tang  Finance Minister teinyakdak (Arun Jaitley) na tsüngda rara ka lir,” ta Congress lenirisa ashi.
Brexit dak sentakba nung pai, “Iba ya ajanga India-a kongshitsü, kechiyong Britian nung sen teimba intokerji India lir,” ta ashi.
European Union (EU) vote agütsütepba osang sangdongba sülen iba dak sentakba nung sorkari tekaraba nung sentong tasen kar benoktsü imlar, ta paisa shisem.