Swara Bhaskar-i China nung best actress angu

September 28, 2015: Fujian province yimtiba nung film benjung amungdang India nunger Ashwiny Iyer Tiwari-i yangluba “Nil Battey Sannata” (The New Classmate) film nung tainlonglong ka tetsü ama shilem agila, Swara Bhaskar-i best actress sempet nguogo.
“Raanjhanaa” film nung tongti shilem agila, Swara-i iba sempet ya Honibar nü tembangba, tanabuba Silk Road International Film Festival nung angu, ta China Radio International osang ajanga metetdaktsü.
“Swara ya actress tajung ka lir. Iba film nung tetsü shilem agitsü atema la temang tuozük seret 8 tali kümdaktsü. La Agra-i oa iba tesem indang sobaliba angazük. La ya shitakba nungbo tetsü ka masü saka film nung tetsü ka ama shilem agi. Film nung shilem agitsü asoshi la kanga bendanga agüja liasü,” ta Tiwari-i IANS dang ashi.
Film benjung nungsa Hong Kong superstar Andy Lau-i “Saving Mr. Wu” film nung shilem junga agitetba ajanga best actor sempet angu.
2015 küm asoshi Features Film tarensen nung film asemi temaba jenjang nguteta liasü. Itemji “Saving Mr Wu”, Russia nunger film “Puppet Syndrome” aser Vietnam nungi “Yellow Flowers on the Green Grass” film tem lir.
Silk Road Film festival nung ambassador, Jackie Chan-i, “Iba film benjung ya alima ajungai sapua Oscars award ama akümtsü kü teimla lir,” ta ashi.
“Iba benjung ya küm shia tajungba akümba ajanga alima ajak nungi shilem agitettsüsa akümtsü imlar. Oscar award ya alima ajaki metetba nüngtugu sentong ka lir anungji ibaji mesüka Silk Road festival-ia parnok dang nungi angazüka ‘Chinese Oscar’ ta akümtsü kü tamang aser teimla lir,” ta pai shisem.
Kasa sentong nung ‘Best Animated Film’ sempet “The Monkey King: Hero is Back” film-i angu aser ‘Best Documentary’ sempet “In the Underground” film-i ngua liasü.
Silk Road film fest-i Busan International Film Festival, Moscow International Film Festival aser Hawaii International Film Festival den lokteper amalitepa inyaktsü sign sütepogo.