Swaraj-i South Africa semdangtsü; BRICS senden nung adentsü

New Delhi, Aami/June 02 (Agencies): Tanü External Affairs Minister, Sushma Swaraj-i anogo pongunü South Africa semdanga New Delhi nungi apusoa ogo; lai South Africa nung tongti lenirtem ajurutsü aser BRICS o IBSA senden na nung adentsü.
Swaraj-isa, Mahatma Gandhi lanur asüdang Pietermaritzburg railway station nung pa train nungi nungzüka yokba sülen küm 125 ajungba sentong ka nung adentsü, ta Ministry of External Affairs (MEA)-i sangdong ka ajanga metetdaktsü.
1893 küm iba tatalokba nungji ajemdaker Mahatma Gandhi-i South Africa nung nisung tapu balala bendangshidanga amshiba anema rara tenzüka liasü.
African linük nung ayongzükba BRICS (Brazil, Russia, India, China and South Africa) Foreign Ministers’ senden Aami/June 4 nü amentsü aser iba senden nung Swaraj-ia shilem agia adentsü.
Ano la menden ser Foreign Ministers of IBSA (India, Brazil, South Africa) senden amentsü, aser iba senden nung alima nung tebilemtsü onük balala atema linük asem amalitepa inyakba tashi itshitsü atema jembitsü, ta MEA osang ajangasa metetdaktsü.
Aami 06, 2018 nü Swaraj-i Phoenix settlement semdangtsü, iba tesem nung Mahatma Gandhi-i ‘non-violence’ tangatetba tenzüka liasü, ta MEA-i ashi.
“2018 küm ya India-South Africa tesendaktep atema kanga tongtibang küm ka lir, kechiyong linük ana tesendaktep yanglur taküm küm 25 ajunger, Pietermaritzburg railway station tatalokba sülen küm 125 ajunger aser South Africa nung nüngtugu lenir, Nelson Mandela sor küm 100 ajunger,” ta MEA-isa metetdaktsü.