‘Sweet Station Anyone Can Bake’ kaket IPR Director-i saya

Dimapur, Rongchii 15 (TYO): “Naga nunger ya film yangluba, noksa tangokba (photography) mesüra kaket züluba nung sempet lir aser maongka dang agütsüra tangari inyakba asenokia inyaktettsü,” ta Information & Public Relations Director, Limawati Ao-i Rongchii (April) 14, 2018 nü Crossword Kohima nung Jenny Kath Thong-i züluba ‘Sweet Station Anyone Can Bake’ kaket sayatsüba mapang ashi.
Asen state nung anguba chiyongtsü tabu balala amshia yangluba cake indang jembidang, iba kaket nungi aika angazüktsü aser iba kaket nung aliba recipe tem ajanga iba kaket tali tajungba aser tongtibangba kümdaktsür, ta Limawati-i ashi. Iba kaket ajanga amtsük yanglurtem tali tejangraba kümdaktsütsü aser tarutsü anogotem nunga lanurtem amtsük yangluba jenjang temaba nung amshitsü imlar, ta pai shisem.
“Alima ajungai amshitettsüsa kaket Naga nungeri zülua Nagaland nung print asüba ajanga Naga nunger asüba atema nümatanga bilemer. Iba kaket ya nüburtemi sabua azüngba kisüng masü saka tajangzük tulu angutsü aser tarutsü nunga Pen Thrill Publication House ajanga iba ama kaket tajung yanglutsü imlaa atar,” ta IPR Director-isa shisem.
Iba kaket zülur, Jenny Kath-i iba sentong nung jembidang, tanur tetsü aser mapa inyaker ka asünung, amtsük yanglutsü angazüknür dang amtsük yanglutsü tesayuba agütsütsü tasak asüba ajanga lai mapang talangka nungi amtsük yanglua aruba indang recipe kaket ka renemtsü mulungtet, ta ashi.
“Iba kaket ajanga tetsürtem aser amtsük yanglurtem ajak yaritsü,” ta lai ashi.
Lai kasa sentong nung jembiba mapang la lanuwa mapang nungi amtsük yangluba aser la amtsük yanglutsü mongin akümba mapang tashi la tetsü aser la kinungbu-i yariba indang otsü ashi.
Lai-sa ashiba agi, amtsük yanglurtemi angatettsüsa iba kaket nung jangja jangja zülua lir.
Iba kaket zülur, Jenny Kath Thong-i amtsük yanglutsü ya lasasa angazük. La ya Tata Institute of Social Science (TISS) Mumbai nung azüng aser tang Department of Rural Development nung Rural Development Officer ka ama inyaker.
Lai amtsük yanglutsü jangraba ajanga Sweet Station ya amenok aser iba ya cake saburtem asoshi tesem tajung ka lir. Iba kaket ya Bible House, Sweet Station aser Crossword Kohima nung angutsü. Iba kaket ya online ajanga alitettsü.
Iba kaket sayaba sentong ya Kohima College nung Asst. Professor, Theyiesinuo Keditsu-i ketdangsüa agi aser RBC pastor, Dr. Kenny Tsela-i Tsüngrem temoatsü meshia sarasadem. Daniel Thong-i tepela o jembi aser Pen Thrill Publication House nungi Publisher, Vishu Rita Krocha-ia jembia liasü.