Swipe-i sen 4,666 alang 4G smartphone ka sayaogo

New Delhi, October 30 (Agencies): Hokolbarnü Swipe Technologies-i India nung nübur ajaki atutsüsa sen 4,666 alang 4G smartphone ‘ELITE 2’ sayaogo.
Iba phone tasenba ya November 8 nü nungi Flipkart ajanga talitsü angutsü, ta company sangdong ka ajanga metetdaktsüogo.
ELITE 2 phone nung 64 bit 1.3 GHz quadcore processor aser 1GB RAM keta lir. Phone nungsa company-i yanglutetba Freedom OS enokja lir aser ibaji Android 5.1 platform ajanga mapa inyaker, ta Swipe sangdong nung shia lir.
Iba smartphone nung 4G network amshitettsüsa SIM ana enoktettsü. ELITE 2 tejaklen 5 megapixel aser tesülen 8 megapixel camera enokja lir.
“ELITE 2 ajanga sen aika kümzükba nung yaritsü ta onok teimla lir. Sen tajemba agi technology tajung nubürtem aoshi yanglua India nunger lanurtem ajangzükdaktsütsüji onok nükjidong lir,” ta Swipe Technologies Founder & CEO Shripal Gandhi-i ashi.
Pune nung amenoka aliba Swipe company ya America nung aliba ‘Uber’ company den lokteper inyaker aser Delhi, Bangalore, Hyderabad aser Pune nung alirtem social media ajanga Uber app amshiba ajanga tia takar ka ELITE 2 smartphone ka angati angutsü maongka ngutettsü akok.
India nung Swipe meyong service centre 600 dak tema lir aser memunui parnoki phone raksaba kara yanglutsü asoshi tesem balaka atakteta lapoktsü sentong lir.