Swiss account alirtem tepoukdaki yoktsüla: Kejriwal

New Delhi, November 13 (Agencies): Deobarnü Delhi Chief Minister, Arvind Kejriwal-i Ato kilonser, Narendra Modi sen note anentsüba telemtetba meyipa agitsüla aser ozüng alema Swiss bank accounts alirtem tepoukdaki yoktsüla, ta ashi.
Paisa, linük tesem ajaklen yamai timtem adokra iba ya ajanga mazüoktettsüsa ozüng dak sentakba timtem adoktsü, ta ashi.
Osangbenertem senden ka nung Kejriwal-i, “November 8 nü sen 500 aser 1,000 note anentsütsü atema telemtetba agiba agientsü ni Ato kilonser dang mepishir, kechiyong iba ya ajanga sensakertemi timtem tulu ajangshidar,” ta ashi.
Ato kilonser, Modi-i nüburtem dang anogo 50 atema timtem aremzükang ta mepishiba o aija AAP tongti lenir Kejriwal-isa, “Iba tetezü taruba anogo 50 tashi shishilembaba tesem shibangtsü asü ? Aluyimertemi anogo kwika litettsü? Nüburtem anogo 50 tashi tarensena nokdaka alitsü asü?” ta asüngdang.
Ato kilonser dang jilushi aiba anenang, ta shia pai Modi dang Swiss bank tem nung ozüng alema account alir par medemertem tama tepuokdaki yokang, ta ashi.
AAP leniri, “Nai parnok anema inyaktsü ta nüburtemi nü dak imlar. Kodang nai ochimashirtemji tepoukdaki yokdir ochimashi anentsü. Ajisüaka iba telemtetba (sen anentsüba) tama agientsüla,” ta ashi.
Kejriwal-isa, Goa nung jembidang Modi-i, ochimashir lakh ishika dang lir ta shiogo, süra kechiba linük nübur ajak nem temerenshi agütsür?, ta asüngdang.
“Iba tensa ya ajanga linük rongsenkettsüng telungi ludar, aser iba kuliji linük tesem ajaklen banks aser ATMs nung tarensen talanglang küma nokdaka aliba ajanga sayur aser iba ya ajanga tesem ajaklen shishilembaba nung kongshiogo,” ta Kejriwal-i ashi.
“Tzüzüng ozüng tebilemtsü adokra, iba tensaji azüoktsü kanga asaktsü,” ta pai Modi dang ashi.
Sen note tamshidak anentsüba ya scheme tamajung ka lir, ta shia Kejriwal-i, “Iba tetuyuba agütsüba sülen kibong ajak nung timtem ajangshidar,” ta metetdaktsü.