Switzerland: Alima nung Rail Tunnel talangiba lapokogo

Switzerland kübok Erstfeld jila nung alima ajunga nung talangtiba aser taroktiba rail tunnel, Gotthard Base Tunnel (GBT) lapokba osang agitsü asoshi osangbenertemi renemshidang agiba noksa ka yangi angur. (Erstfeld, June 01)

Erstfeld, June 01 (Agencies): Switzerland kübok Swiss Alps nung alima ajunga nung talangtiba aser taroktiba rail tunnel tanü, Bodbar nü lapokogo.

Europe anüdoklentip aser anülulentip na sendaktepdaktsüba kilometer 57 talang Gotthard Base Tunnel (GBT) tanü lapokba sülen senzüsenpongertemi taoba mapang den mapang kanga agi tajemba agia sentsüsenpongtettsü.

Tan lapoktsüba GBT tunnel-i Japan nung tentetba kilometer 53.9 talang tunnel ajangteter lir aser train balalai taküm December ita nungi tenzüka iba tunnel ajangdanga senzüdaktsütsü renema lir.

Tanü GBT tunnel lapokba sentong nung German Chancellor, Angela Merkel; France Tir, Francois Hollande aser Italy Ato Kilonser, Matteo Renzi nungeri Switzerland lenirtem den aroki shilem agiba osanga jangjaogo.

Switzerland tiyongtsülen, Uri canton kübok Erstfeld nungi tenzükba GBT tunnel ajanga jajaba ajanga ghonda ka nung kilometer 200 kara jajatetba train-temi Zurich nungi Italy kübok Milan tonga ghonda 2 ser minute 40 shi nung aotsü.

Dollar sen billion 12 dak tema endoka yangluba GBT tunnel ya mapa inyaker nisung 2,400 shi küm 17 tashi agia yangluba osanga jangjaogo.