Switzerland police-i FIFA Tatong Tir 2 apu

Zurich, December 03 (Agencies): Switzerland police-i ozüng alema süpokrem sen agiba ken o nung ajemdaker FIFA nung Tong Tir 2 tashi tanü Brehostibar nü Zurich yimti nung apuba osang ka sorkar ketdangser kati metetdaktsüogo.
Tanü apusang anaji Paraguay nunger Juan Angel Napout aser Honduras nunger Alfredo Hawit Banegas na aliba osang jangjaogo.
“Latin America nung ayongba football asayamong den sentakba shishilembatsü temeten aser World Cup qualifying asayatem nung shilem agitsü temeten agütsütsü melena süpokrem sen million aika agi ta temulung melemi bilemba ken o ajemdaker South American Football Confederation (SAFC) nung Tir, Napout aser Confederation of North, Central America & Caribbean Association Football (CONCAF) nung Tir, Hawit na apu,” ta Swiss justice ministry-i osang jangjashitsü.
Ochimashi inyakba aser süpokrem sen agiba ken o nungsa ajemdaker, FIFA Tir, Sepp Blatter aser pa melenzüktsü renemshia alisang, Michel Platini na nema tang temerenshi agüja lir.
Ano külen, nisung ka nem FIFA Tir menden küm 12 dak tema mebendaktsütsü telemtetba ka FIFA Reform Committee-i tanü agiogo.
Francois Carrard-i aniba ludeni tanü agiba telemtetbaji sangküm 2016 küm February ita 26 nü ayongba FIFA Extraordinary Congress senden nung shilem agir züngsem 209-i agizükba sülen ozüng küma benshitsü.