Synod-i lemtetba osang Pope dangi yokogo

Vatican City, October 25 (Agencies): Catholic bishop temi parnok arogotem nung kibong komala adentsü iba dak sentakba nung telemtetba agirtem (Synod) taginüba aser latetba osang ka Pope Francis dangi yokogo.
Iba telatetba agizüktsü mesüra magizüktsüji Pope dak tashi peria lir. Iba telatetba nung balar alir aser tanaben kibong kümer alirtem arogo nung shilem agidaktsütsü mesüra magidaktsütsü tebilemtsütem shisema lir.
Iba den külemi tetsür o tetsür na mesüra tebur o tebur na medemer mesüra kibong kümer alirtem atema-a benoka lir.
Synod-i item taginüba aser telatetba bendena inyakdang hopta asem tashi agia liasü aser iba mapang Catholic amanger kibong aika nung telemsa adokogo ta Pope Francis-i ashi.
Anungji item taginüba aser telatetba nung Catholic tesayuba aser kibongtem den liro metema Pope-i kechi ashir ibaji atatsüba dak alaka tanga lenmang kecha mali.
Parnoki lemtetba tongtibangtibaji, balar alirtem aser tanaben kibong kümer alirtem arogo nung adenba tebilemtsü ya lir. Parnoki ashiba agi item tamangertem Kibuba bejung nung shilem magidaktsütsü.
Parnokisa, tebur o tebur na kibong kümer aliba kibong ka nung sayutsüngirtemi kechi komala kibong tesayuba ka agütsütsü, ta asüngdanga lir.
Arogo ka jagi shinga mebendangi amshitsüla aser tamajungba nungi anitettsü merangtsüla, ajisüaka tetsür o tetsür na mesüra tebur o tebur na kibong kümer aliba yabo Tsüngrem sentong anema lir aser ibaji tagizüktettsü mapa masü, ta parnoki shia lir.
Tatem nung Francis-i, “Parnoki asenok koda masüba jenjangi meyoknüba agi tanü tensa den rarar,” ta ashi.
Pai, Arogo ka jagi Arogo tesayuba dak keta aliba ama telemsa adoker aliba sobaliba balala ajak amokbangtsü nüngdaker, ta ashi.