Syria ajunga nung ghonda 72 tashi tongpang meraratsü: Mitkar

Damascus, July 16 (Agencies): Tanep, Bodbar anepdang 1:00 ako nungi tenzüka Syria ajunga nung ghonda 72 tashi tongpang meraratsü renemba osang ka Syria mitkar lenirtemi tanü metetdaktsüogo.

“Syrian Arab Republic ajunga nung July 6 anepdang nungi tenzüka July 8 nü tashi tongpang merarai yimji yimjung tia alitsü sangdonger,” ta parnoki metetdaktsü.

Alima ajunga nung Muslim nisungtemi ita ka tashi lumibaren, Ramadan sentong tembangba nüngtem nung anogo 3 agia amongba Eid al-Fitr benjungmong mapang nung tan Syria nung tongpang meraratsü osangji sangoktsür lir.

Ajisüaka, tongpang meraratsü osang sangoktsüba jakdang Syria sorkari sorkar anemer teloktem den tongpang meraratsü tezüngzüktep agi asü magi iba osang tang tashi mejangjateti lir.

Syria ajunga nung tongpang meraratsü osang sangdong aka, alima teloktep mitkartemi nungitba Syria mitkartemi Damascus anüdoklen, Maydaa jila tanü amakba osang ka meimchir temeten asoshi nokdakba tongti tentet, Syrian Observatory for Human Rights (SOHR)-i metetdaktsüogo.

Maydaa jila ya Syria sorkar den bendanglen amenba yimjung senden nung sorkar anemer tenüng nung o jembitsür, High Negotiations Committee (HNC) nung densemer, Jaish al Islam teloki amokbanga aliba jila ka lir.