Syria ajungai kiralongrar anema raratsüla: Bashar Assad

Beirut, September 16 (Agencies): Syria sorkar aser sorkar anemer napronglai külemi lungjemer külen kiralongrar anema raratsü tajungshiba olen ka Syria Tir, Bashar al-Assad-i tanü Bodbar nü metetdaktsüogo.

“Syria-i tang ajurua aliba kiralongrar den sentakba timtem magien tashibo Syria nung yimtenren ken o bentetbaren malitsü,” ta shia, Assad-i tanü külemi lungjemer kiralongrar anema raratsü tajungshiba olenji sangoktsü.

Ano, West-i küm 4 tejaklen nungi tenzüka Syria sorkar anemertem yariba ajanga Europe-i tang refugee den sentakba timtem khuret tulu ajurur ta pai West aija ashi.

Ano külen, Damascus den amalitep melibo alimai tang Syria aser Iraq na nung lendong kanga sashia atalokdaktsüba Islamic State (IS) kiralongrar telok mesamatsütettsü ta Russia Tir, Vladimir Putin-ia tanü metetdaktsüba osang jangjaogo.

Syria tzüyimkümlen, Latakia jila nung tayimtsü tesep ka tentettsü nükjidong nung Russia-i par tongpang nung amshitsü osettsüset aser mitkar züngsemtem Latakia-i tawa yokba osanga bushiteta lir.

Ajisüaka, IS kiralongrar anema raratsü atema masü saka Assad-i aniba Syria mitkar tashi itshitsütsü nükjidong nung Russia-i par mitkar aser tongpang nung amshitsü osettsüsetji Syria-i yoker ta shia, US densema West linüktemi tang tebilemtsü khuret benoka lir.

“Syria nung tentetba yimtenren teloktem, sorkar aser sorkar anemertem ajungai külemi lungjemer kiralongrar anema raratsü nungdaka kümogo. Syria nung tesep tenteta lendongtsüdong kanga sashia atalokdaktsüba kiralongrar ajunga samatsüba ajanga dang Syria-i tang ajurua aliba yimtenren ken o ya bentettsütettsü,” ta Assad-i nenshia ashi.

Paisa ashiba agi, tang adokba mangatettep ken o bentettsü atema jembitepba senden mapang shia mentettsü saka kiralongrar ajunga mesamatsü tashibo item sendentemji amajok nung amener alitsü.