Syria atema UNSC rongdak senden ka amentsü

United Nations, September 25 (Agencies) : Syria nung tang tatalokdak tensa atema Deobarnü UN Security Council rongdang senden ka amentsü, ta ketdangsertemi ashi.
Iba senden ya US aser France nati mepishia akarba lir, ta Xinhua news agency osang ajanga metetdaktsü.
Iba senden ya miimshia masü saka ajaki meteta amentsü. Ambassador temi jembibatemji TV aser radio nunga yoktsü aser angutsü, ta UN ketdangsertemi ashi.
Tang UN Headquarter, New York nung ‘annual high-level debate’ takadak asüba agi iba senden ya Deobarnü akatsüsa akümer.
US-i aniba teloki Syria nung anüng nungi amakba atema taoba hopta Russia-i UN Security Council rongdak senden ka ayonga agia liasü.
Deobarnü akatsü aliba senden nung Aleppo, Syria nung military tali ayuba tsütsü jembitsü.
UN Secretary-General Ban Ki-moon-i, Aleppo nung tawa military tali ayuba ngua kanga aoksa. Syria nung mangatettep adokba sülen Syria anüdoklentip aliba yimtitem nung teraksa aser takoksa timba adokogo, ta Deobarnep ashi.
Hokolbarnü-a Aleppo anüdoklen tsütsü tapoktsü tesashi kar apokba mapang nisung 30 shi süogo, ta Syrian Observatory for Human Rights sangdong ka ajanga metetdaktsü.
Iba lendongji Syria Defence Ministry-i Aleppo nung sorkar anemertem anema yimya balaka agi raratsü sangdongba sülen atalokba lir.