Syria bomb lendong nung 10 pokset; 25 shi yiru

Damascus, September 02 (Agencies): Syria Tir, Bashar al-Assad jenokdak, Syria tzüyimkümlen tentetba Latakia yimti nung bomb lendong tesashi ka tanü Bodbar nü atalokba osang jangjaogo.

“Kiralongrartemi Latakia yimti kübok Hamam square nung car gari ana nung bomb alenoker kasaji pokdakja lendong atalokdaktsüba osang bushitetogo,” ta sorkari ketdang asüba SANA osangi metetdaktsü.

Tanü atalokba lendong nung nisung 10 poksetba aser ishiba agi nisung 25 shi yiruba osang tang tashi nung jangjaogo ta osangi ashi.

2011 küm March ita nungi tenzüka Syria nung tongpang kanga sashia rara aka, Assad densemba Alawite kin kanga lungsoa alidak, Latakia nungbo lendong tsüdong kangarabo matalokba osang bushiteta lir.

“Tan atalokba lendong ya Syria nung tongpang raratsü tenzüker tanü tashi nung Latakia nung lendong tesashitiba ataloker lir,” ta nübur temeten asoshi nokdakba Syrian Observatory for Human Rights (SOHR)-ia metetdaktsü.

“Latakia yimti nung tongpang nung amshitsü rocket kalokja amakba dakalaka tan ama bomb lendong tesashi atalokba osangbo taoba mapang bushiteta mali,” ta SOHR lenisang, Rami Abdel Rahman-i ashi.

Sorkar anemertemi Latakia yimti meküta aliba tenemtem nungi rocket aser missile-tem mapang shia kalokja Latakia yimti amakba osanga bushiteta lir.

Ano külen, Damascus kübok tentetba engineering college ka nung mortar bomb ishika tsükdakja tanü lendong atalokba ajanga kaketshir 2 poksetba aser nisung 15 shi yiruba osanga SANA-i metetdaktsüogo.

Syria sorkar aser sorkar anemer na tsüngda tongpang raratsü tenzüker tanü tashi nung nisung 240,000 dak tema asüba osanga bushiteta lir.