Syria bomb lendong nung nisung 42 asü

Damascus, February 24 (Agencies) : Hokolbarnü taküm bendanga agütsür kati gari nung tapoktsü alenloker Susian jila nung pokdaktsüba lendong nung tajemba agi nisung 42 süogo, ta lendong asadanger telok kati ashi.
Turkey arrtsülen Turkey force tem aser Free Syrian Army (FSA) teloktemi Islamic State (IS) telungpur aritokba sülen anogo ka lir Al Bab yimti amanglemba sülen iba lendong atalok, ta osangbenertemi ashi.
Syrian Observatory for Human Rights temi ashiba agi, iba lendong nung asürtem timba Free Syrian Army (FSA) telok nungi liasü aser ano tasüba timba akümtsü kechiba süra lendong kanga tesashi liasü. Telok karibo iba lendong nung nisung 50 shi asü ta jembidar.
Anogo ka tejakdang IS-i Al Bab yimti nungi atsünginba sülen Brihostibarnü Turkey force tem aser Free Syrian Army (FSA) telok temi iba tesem amanglema liasü.
IS telungpurtemi parnok tesepti tulutiba rongnung ka, Turkey anasa Syria anüdoklentip tsütsü aliba Al Bab yimti nungi parnoki Turkey force tem aser Syria nung sorkar den meputepi aliba teloktemi mita aoba inyakyim ‘Euphrates Shield’ kübok anogo 100 tashi raraba sülen atsüngin.
IS-i tang tashi nung Turkey sepai aser sorkar den meputepi aliba telok nungi parnok nisung 400 shi tepsetogo, ta ashir.
Iba tesem agitetba ajanga Turkey nung Syria anüdoklen tensa tera tajungba akümtsü.
Syria Army temi Al Bab yimti takok ngua longbangtetba ajanga anüdoklen aliba Deir al-Zour province len mesüra anüdoklen aliba al-Raqqa yimti leni IS telungpur jena aotsü mokoki liasü.
Tan Al Bab amakba ya Turkey aser Russia nunger senteper amakba lir, ta Syrian Observatory for Human Rights-i ashi.