Syria foreign minister-i India semdangtsü

New Delhi, January 5 (Agencies): Syria Foreign Minister Walid Muallem-i January 9 nü nungi tenzüka, anogo asemnü asoshi India arua semdangtsü aser iba mapa pai India nunger lenirtem dang par linük nung tatalokdak tensa indang lemsateptsü.
Russia-i Islamic State (IS) telok samatsütsü asoshi military operation tang oyaa aliba indanga India sorkar den lemsateptsü.
Muallem-i External Affairs Minister Sushma Swaraj aser National Security Advisor Ajit Doval na dena sorkar mapa balala nung inyakertem den ajuruteptsü sentong lir.
UN-i rara agi sünger aliba Syria linük nung yimjung bener arutsü ajungshiba dak sentakba maparen nung pai India semdangerba lir. Syria nung küm pezü tsüngda nung rara ajanga nisung 300,000 tashi taküm laluogo aser nisung million tenet shi linük toktsür danga linüktemi jena ogo.
Europe linüktem nung Syria nungi jena aoba nisung jenti lir.
Muallam-i Ato Kilonser Narendra Modi dena ajuruteptsü imlar.
Modi-i Moscow semdangba mapanga Russia Tir Vladimir Putin den Islamic State aser Syria tebilemtsü dak sendakba nung kanga aroka ia sensak sema liasü.
Paris nung lendong atalokba sülen Islamic State inyakyim metettsü asoshi anüolen aliba linük aikati Syria sorkar den tongteprateper.
Syria Tir Buthina Shaban indang Special advisor-i March 2013 nung India semdanga liasü. Iba mapang lai India nung lenirtem den ajurutepa lar linük tensa osang lemsatepa liasü.