Syria-i yimjung sentong mapa küma inyaktsü renema lir: Assad

Damascus, February 24 (Agencies): Syria-i yimjung sentong mapa küma inyaktsü renemba osang ka Syria Tir, Bashar al-Assad-i Russia Tir, Vladimir Putin dang tanü, Bodbar nü metetaktsüogo.
Putin den tanü telephone ajanga jembidang Russia o United States nati ayonger tan Honibar nü nungi tenzüka Syria sorkar aser sorkar anemer na tsüngda yimjung tezüngzüktep agitsü asoshi benokba mapatong mapa küma inyaktsü renema aliba olenji Assad-i metetdakja liasü.
Syria sorkar aser sorkar anemer na tsüngda yimjung tezüngzüktep agiba den külemi, tang Syria aser kidangsüa aliba Iraq na nung lendong kanga sashia atalokdaktsüba kiralongrar telok tetsüti, Islamic State (IS) aser Jabhat al-Nusra telok anema maneni raratsü onüka Assad o Putin nati tanü benoka jembi.
IS aser Jabhat al-Nusra telok nabo US o Russia nati ayongba yimjung tezüngzüktep agitsü telok rong nung densema mali.
Ano, tanüngba Syria sorkar anemer teloktemi tan ayongba yimjung sentong nung shilem agitsü mesüra magitsü osang tan Hokolbar nü tashi nung metetdaktsütsü renema lir.
Syria sorkar aser par pusemer, Russia mitkartemi sorkar anemertemi agia aliba tesemtem tanaben agishitsü merangba aser tayimtsütem nungi bomb tsükdakja tai maketba nüburtem amakba maparen anen nung dang tan ayongba yimjung senden nung shilem agitsü renemba osang ka Syria sorkar anemer rong nung tongti telok, High Negotiatios Committee (HNC)-ia metetdaktsüogo.
“Tan ayongba ama, Syria sorkar aser sorkar anemer nati asangsang nung yimjung tezüngzüktep agiba ajanga dang taoba küm 5 tejaklen nungi tenzüka Syria nung tongpang rarabaren agientettsü,” ta US Secretary of State, John Kerry-ia metetdaktsü.