Syria & Iraq refugee-tem atema teyari sen mn 350 agütsütsü: Japan

Tokyo, January 20 (Agencies): Syria aser Iraq na nung tongpang kanga sashia raraba ajanga taküm melitettsüsa küma bendanglen jenokba refugee nisungtem nem chiyongtsü aser iba amala nungdakba teyari agütsütsü asoshi teyari sen dollar sen million 350 tashi agütsütsü onük Japan parliament yimsüsürtemi tanü Bodbar nü agizükogo.
Japan-i yaküm 2014 küma Syria aser Iraq na nung alir aser temeket tesemtem nung jenoker nisungtem yaritsü nükjidong nung teyari sen dollar sen million 810 tashi agüja liasü.
“Taküm March ita tembangtsü renemba senotsü telemzükbaren nung tan agütsütsü nangzükba teyari sen dollar sen million 350-ji densemdaktsüogo,” ta Japan Foreign Minister, Fumio Kishida-i tanü sangoktsü.
“Syria aser Iraq na mitkartemi kiralongrar ket nungi tanaben agiba tesemtem nung alir nüburtem nem chiyongtsü, tajemtsü tzü, kaketshisatsü bushitsü aser talidak tanaben tentettsüshi maparen nung ozü Japan-i maneni nungita nungdakba teyari agütsütsü renema lir,” ta pai metetdaktsü.
Middle East, kiralongrartsüren aser refugee nisungtem den sentakba onüktem tongtipangsüa benoktsü renemba Group of Seven (G7) senden Japan nung taküm amentsü ayongba olen ka Kishida-isa metetdaktsüogo.