Syria: IS teloki nisung 400 pur ao

Damascus, January 17 (Agencies): Islamic State (IS) kiralongrartemi sen meshizüktsü mesüra parnok takhangba kar atalokdaktsütsü nükjidong nung nisung 400 shi Syria anüdoklen tsütsü Deir al-Zour province nungi tashiyim agi pua anir aoba osang ka sorkar ketdangsertemi tanü, Deobar nü metetdaktsüogo.
IS teloki al-Bughailiyeh jila nungbanga amakdang, tetsür aser tenurtem dena nisung 280 dak tema kaset aser item tasümangtemji Iraq anasa aliba Euphrates ayong nungsa merepoktsü ta Xinhua osangia metetdaktsü.
Iba amakba mapang sorkari tanüker yutsüba tesemtem nung parnoki temang nung alenloker apokba tapoktsütem aika poka liasü ta osang ajangasa ashi.
Syria sorkari ketdang asüba SANA osangi ashiba agi, IS kiralongrartemi al-Bughailiyeh jila nung nisung jentizü dokshitsüogo.
“IS teloki tan Honibar aonung al-Bughailiyeh jilai miima ai aser sorkar mapa inyakertem aika tepset,” ta London nung amenokba Syrian Observatory for Human Rights (SOHR) teloki metetdaktsü.
IS teloki tan amakba ya IS aser Syrian mitkartem na Deir al-Zour tesem aika nung raraba tongpang den sentaktepba maparen ka lir.