Syria kübok Idlib yimti nung nisung 23 tepset

Azüklen noksa nung tekümzüertemi aonung nisung yirur alir bushiba noksa angur aser tsünglanglen teyirur ka anepaludak tesemi anir aoba noksa angur.

Damascus, May 31 (Agencies) : Syria kübok anüdoklentip tsütsü aliba Idlib yimti nung nsiung 23 tashi tayimtsü amshia amakdang  süogo ta activist temi metetdaktsü.
Yasüng Russia nunger tayimtsütemi tesem balala amak, ta UK nung amenoka aliba Syrian Observatory for Human Rights-i ashi.
Turkey-ia Russia dak tai tongloktsüogo aser parnokibo nisung 60 tashi süogo ta ashir, saka Russia-i parnoki shilem magi ta metetdaktsü.
Idlib yimti aser province nung al-Qaeda den tesentaktep aliba Nusra Front pur aliba tesemtem lir.
Taküm February ita US aser Russia nati yimjung olemtep alitsü tenzükba maparen nung Nusra Front medendaktsüi lir.
Syrian Observatory osang ajanga ashiba agi, anüng nungi amakdang nisung aliba tesem aika kongshiba nung mozüki ka aser public garden ka dena liasü.
Tasürtem rongnung tanur tenet dena liasü aser ano nisung aika yirua lir, ta parnokisa metetdaktsü.
Ajisüaka, Russia indang Defence Ministry, Igor Konashenkov atema otongdari ashiba agi, iba mapa nung Russia nunger shilem kecha mali.
“Russia nunger tayimtsütemi combat missions kecha meinyak, Idlib nung air strike maliasü” ta pai sangdong ka nung metetdaktsü.
Ano külen, Turkey foreign ministry-i sangdong ka nung, Russian aser Syrian ketdangsertemi ozüng alema mapa inyakba atema alimai ola adokang ta tayongzükba agütsü.
Russia-i Syria Tir, Bashar al-Assad den tongti süa yariteper aser parnoki kiralongrartem anema air campaign agiogo.
Syria nung Russia-i inyakba mapangji Turkey-i aitsür aser parnoki Syria nung Assad’er sorkar anema noktaker.