Syria mitkar tayimtsütemi nisung 28 shi tepset: SOHR

Syria sorkar mitkartemi par helicopter tayimtsü amshia Syria anüdoklentip tsütsülen Islamic State kiralongrar teloki agia aliba al-Bab jila nung bomb-tem tsükdakja tanü Honibar nü amakba sülen bomb apokdak nungi mokozü kanga sashia adokba noksa nung angur. (Al-Bab, July 11)

 Beirut, July 11 (Agencies): Syria sorkar mitkartemi par tayimtsü amshia Syria anüdoklentip tsütsü jila ka amakba ajanga ishiba agi nisung 28 shi tanü Honibar nü tepsetba osang jangjaogo ta nübur temeten asoshi nokdakba tongti telok kati metetdaktsüogo.

Islamic State (IS) ta ajaba kiralongrar teloki agia aliba jila tanü amakdang tila tanur 3 densema tai maketba nübur 19 tashi tepsetba osang jangjaogo ta Britain nung tentetba Syrian Observatory for Human Rights (SOHR) teloki ashi.

Syria sorkar mitkartemi helicopter tayimtsü amshia Aleppo yimti nungi northeast tsütsüleni kilometer 30 shi pilar, al-Bab jila tanü amak ta par teloki shisem.

Ajisüaka, par mitkartemi al-Bab jila nung amakba sentong ka danga tanü meinyak ta shia, par mitkartemi nüburtem tepsetba osangji magizüker ta Syria mitkar lenirtemi metetdaktsüogo.

United States-i aniba alima teloktep mitkartemia par tayimtsü amshia Syria nung tentetba IS telok anema tang teraradak lir saka parnoki Syria Tir, Bashar al-Assad-i aniba mitkartem den külemi lungjemer IS anema raratsü memelungi lir.