Syria mitkartemi IS ket nungi Palmyra yimti agiogo

Damascus, March 27 (Agencies): Syria sorkar mitkartemi Islamic State (IS) kiralongrar  telok ket nungi Palmyra yimti tanaben agishiba osang ka mitkar lenirtemi tanü, Deobar nü metetdaktsüogo.
Russia mitkartemi par tayimtsütem yoka nungitba sülen Syria sorkar miktartemi Palmyria yimti agishiba osang jangjaogo.
“Ozü mitkartemi IS ket nungi Palmyra yimti tanaben agishiba ya tongti mera ka agir lir. Ano, tan Palmyra yimti agiba ajanga Syria mitkar aser ozü mitkar yarir ajungai IS madak takok ngua tongpang raraba kuli sayur,” ta Syria Tir, Bashar al-Assad-ia metetdaktsü.
“Tan IS ket nungi Palmyra yimti agiba ya IS telok nem tamakok tulu bener arutsür lir,” ta mitkar lenirtemia tanü metetdaktsü.
IS teloki Palmyra yimti ita 10 tejaklen tashiyim agi agiba den külemi, Palmyra aser temüket tesemtem nung tentetba nüngoa jenti raksatsüba osang bushiteta lir.
“IS teloki Palmyra yimti toktsür Palmyra anüdoklen tsütsü, Deir Ezzor nung jenokba osang jangjaogo,” ta Britain nung tentetba Syrian Observatory for Human Rights (SOHR) tentetia metetdaktsüogo.
Syria sorkar mitkartemi Palmyra par tesep ama amshia, Deir Ezzor aser Raqqa na densema, IS teloki tesep tentetba tesemtem maneni amaktsü alizüng yua lir.
Palmyra tongpang nung IS züngsem 400 aser Syria sorkar mitkar züngsem 180 shi asüba osang bushitetogo ta SOHR-isa metetdaktsüogo.