Syria nüburtem nem teyari osettsüset mapang shia tongtsütsü: UN

Syria kübok Homs anüdoklentip tsütsülen Al-Houla nung alir nüburtem asoshi tongtsüba teyari oset aser chiyongtsütem UN World Food Program (WFP) aser Syrian Arab Red Cresent ketdangsertemi gari nungi ajungzükba noksa nung angur. (Al-Houla, June 25)

Geneva, June 25 (Agencies): Syria yimtiba, Damascus northeast tsütsülen tentetba Kamishly yimti nung alir nüburtem nem chiyongtsü aser nungdakba teyari osettsüset Damascus nungi tayimtsü agi mapang shia tongtsütsü renemba osang ka United Nations (UN) kübok tentetba World Food Program (WFP)-i tanü, Honibar nü sangotksüogo.
Par telokisa ashiba agi, Syria nüburtem nem nungdakba teyari osettsüset aser chiyongtsü agütsütsü maparen ya teyari agütsür telok ajungai par tentet den amalitepa inyaktettsü.
Ita ka tsüngda nung tayimtsü agi chiyongtsü aser teyari osettsüset 25 ben tashi tongtütsü renemba osang ka par tentetisa metetdaktsüogo.
Tayimtsü shiai chiyongtsü noklang nung shilem 70 aser rongdaka nungdakba osettsüset shilem 30 densemba osettsüset ton 1000 shi taret khen nung tongtsütsü renemba osang ka WFP-i metetdaktsü.
“Teyari osettsüset aser chiyong abenba tayimtsütemi Damascus International Airport nungi Syria sorkari agia aliba Kamishly tayimtsü anendak tonga bener otsütsü. Iba mapatong inyakba ajanga timtem toushi ajurushia alir nisung 150,000 shi nem nungdakba oset aser chiyongtsü agüja yaritettsü,” ta WFP otongdar, Bettina Luescher-i ashi.
Kamishly yimti ya Turkey arrtsülen aser Iraq anasa tentetba yimti ka lir aser iba yimti shilem ka Syria sorkari agia lir aser tanabuba shilem Kurdish sepaitemi agia lir.
WFP dak alaka, World Health Organization, UN Refugee Agency aser International Committee of Red Cross densemba nübur yaritsü telok aser tentettemia kanga meranga inyaka Kamishly nung alir nüburtem yariba osang ka lai metetdaktsü.
Islamic State (IS) kiralongrar teloki Raqqa aser Deir Ezzour governorate amokbanga aliba yong 2014 küm nungi tenzüka kidangsüa tentetba Hassakeh governorate nung densemba Kamishly tonga gari agi teyari osettsüset bener motsüteti aru ta lai osang jangjashitsü.
“Tanga tesem nung inyakba ama, Kamishly nung alirtem nema teyari osettsüsetji gari nung tongtsütsü temelaba lir. Ajisüaka, IS kiralongrartemi kidangsüa aliba tesemtem tashiyim agi agia, teyari oset abenba gari convoy-tem amakba yong tayimtsü ajanga dang teyari osettsüsettemji Kamishly tonga bener otettsüsa tia ajurua lir,” ta lai shisem.
“Tan June ita 23 nü nungi tenzüka tanü tashi nung WFP tenteti Syria kübok tentetba governorate 14 rong nungi governorate 12 tashi nung alir nübur million 3.5 shi nem nungdakba teyari osettsüset aser chiyongtsü takok ngua tongtsüogo. Ano, tarutsü hopta ishika tsüngda nung nisung million 4 tashi yaritsü alizüng ozü WFP-i yua lir,” ta Luescher-i sangoktsü.