Syria nung civilian 100 shi tepset

Beirut, May 26 (Agencies): Syria kübok al-Mayadin jila nung Brihostibar nikongdang nisung 100 shi tepsetogo, ta Britain nung amenoka aliba Syrian Observatory for Human Rights ajanga metetdaktsü.
US-i aniba coalition warplanes-i iba tesem amak aser idangji tanurtem dena asü aser asürtem rongnung ISIS züngsemtem indang kinungertem dena liasü, ta SOHR-isa ashi.
US-i anir ISIS anema raraba telok nung otongdar kati ashiba agi, May 25 aser 26 anogo parnoki al-Mayadin anasa anüng nung tayimtsütem amshia amak aser iba osang metetpeladar.
Tayimtsü amshia amakdang tanur 40 dak tema süogo aser al-Mayadin indang municipality building auyi küma samatsüogo, ta Observatory-isa metetdaktsü.
US-i teyari agüja nungitba Syrian Kurdish aser Arab rarartemi ISIS den kanga meranga raraba ajanga Raqqa nung alirtem aika iba tesem toktsür jena ogo, ta parnokisa shisem.
Yasüng 7:25 ako (1625 GMT) meta yimti nung alirtemi aircraft aser warplanes yimzüba angu aser iba sülen mapang tatsüka lir külen tayimtsütem nungi kiojen ana dak missiles khaloktsü. Kiojen ana nung ISIS züngsemtem rongnung Syrian aser Moroccan kibongtem liasü. Iba sülen ayaterm süir tayimtsütem nungi tesem aika amak, ta Syrian Observatory for Human Rights-isa metetdaktsü.
Syria aser Iraq nung ISIS tashimeiti kümogo aser parnok anema rarartemi tesem aika parnok ket nungi meyipa agiogo.
United States-i aniba teloki ashiba agi, parnoki tayimtsütem ajanga amakdang civilian tem taküm melalutsü atema kanga dang kümdanga mapa inyaker.