Syria nung ghonda 24 tsüngta nisung 80 tepsetogo

Damascus, November 27 (Agencies): Syria anüdoklen aser southern tsütsü Russia aser Syria sorkar nati südi, ta temulung melemteti amakba nung ghonda 24 tsüngta nisung 80 jungnüa taküm samaogo. Nisung asürtem ya timba civilian lir.
Anüdoklen aliba Deir Az Zor province nung Russia nunger indang südi, ta temulung melemteti aliba tayimtsütemi Euphrates River anüdoklen tzüküm nung aliba al-Shaf’ah yimtsüng nung Deobarnü bomb aser injangtem amshia amakba nung nisung 51 taküm sama.
Kasa anogo sa al-Darnaj yimtsüng nunga nisung pezü tepseta iba province nung nisung asür 55 jungogo.
Raqqa aser Deir Az Zor yimtitem ya Islamic State of Iraq & Levant (ISIL, koba dang ISIS ta ajar) tasep ka ama liasü, saka item tesemtem nungi iba telok atsüngdokba sülen Syria nung ISIL telok ya Deir Az Zor nung tatempangba lir, ta temulung malemer.
Syria yimtiba Damascus tezülen aliba Eastern Ghouta district nunga Russia aser Syria sorkari Deobarnü injang tesahi khalokja bomb pokloktsüba nung nisung 25 taküm sama.
Misraba tesem nung aliba shishilempadak tesem nung tenük yoker amakba mapang nisung 16 tepset. Medyara aser Douma nunga artillery amshia amakba mapang nisung 9 tepset.
UK nung aliba Syrian Observatory for Human Rights ajanga ashiba agi, parnok 25 rongnung tanur pongu aser tetsür asem densema lir.