Syria nung hopta 2 tashi yimjung alitsü nangzükteper

Damascus, February 26 (Agencies): Syria Tir, Bashar al-Assad-i aniba Syria sorkar anemertemi sorkar mitkartem den hopta 2 tashi merarai yimjung nung alitsü tezüngzüktep agiba osang ka tanü, Hokolbar nü metetdaktsüogo.

Ajisüaka, iba yimjung mapang nung Syria sorkar mitkartemi kiralongrartem den raratsü dak atemer, parnok anema meraratsü takhangba olen ka sorkar anemertemi benoka lir.

“Free Syrian Army aser tanüngba Syria sorkar anemertemi hopta 2 tashi Syria sorkar mitkartem den tongpang meraratsü nangzüktepogo,” ta Syria sorkar anemer rong nung tongti telok, High Negotiations Committee (HNC)-i osang jangjashitsü.

Syria sorkar den yimjung tezüngzüktepji asüng, Honibar ayaterem nungi tenzüktsü ta par teloki shisem.

Syria sorkar anemer telok ajungai Russia aser US nati külemi lungjemer ayongba yimjung tezüngzüktep nung shilem agitsü mulungba osang metetdaktsüba osang ka Russia Tir, Vladimir Puitn-ia tanü metetdakja liasü.

“Syria nung tongpang raraba anena par linük nung yimjung alitsü alizüng asangsang nung ajangzüktsüji kanga dang tasak maparen ka lir. Ajisüaka, Syria nung yimjung bener arutsü asoshi tongpang rarartemi par tongpang rarabaren anena yimjung nung alitsü nangzüktepba dak alaka tanga lenmang kecha mali,” ta Putin-i shisem.

Ano, Syria nung yimtenren ken o bentetja par linük nung yimjung yimji lidaktsütsü mapatong dak alaka tang sentongtem benoktsü mulunga maliba olen ka Russia Deputy Foreign Minister, Mikhail Bogdanov-ia yashi, Brehostibar nü metetdaktsüogo.

Putin aser US Tir, Barack Obama nati aroki tan February ita 22 nü sangoktsüba Syria nung yimjung alitsü mapatong nung Islamic State (IS), Jabhat al-Nusra aser United Nations Security Council (UNSC)-i kiralongrartem ta züngokba teloktembo densema mali.

Tan agiba yimjung tezüngzüktep mapa küma inyakba mesüra meinyakba osangtem Moscow aser Washington nati aroki tendanga agitsü renema lir.