Syria nung IS dak Russia-i missile khaloktsü

May 31, 2017 (Agencies): Mediterranean nung aliba Russia nunger indang raraba rong aser submarine ajanga Syria tiyonglen Islamic State (IS) aliba tesem ka nung cruise missile pezü khaloktsü.
Taoba küm November ita amshiba sülen tanü iba missile ya IS telungpur tesep aser raraba oset tesashi yua aliba tesem, Palmyra yimti anasa khaloktsü, ta Russia defence ministry ajanga ashi.
IS tesep, Raqqa nungi telungpurtem iba tesem nung arua aliba osang angashi.
2015 küm nungi tenzüka Syria tir, Bashar al-Assad puküma Russia nungeri tayimtsü aser missile amshia IS telungpur den rara arur.
UNESCO World Heritage nung züluoka aliba tesem aser Palmyra tesem nung IS telungpur temi agia aliba ya Russia teyari amshia sorkar indang mitkartemi 2016, March ita nung makdok saka ita ti dang lir telungpurtemi iba tesem tanaben agi.
Iba tesem ya sorkar indang mitkartemi taküm March nung tanaben agitet, saka iba temeket nung raraba manener.
Raraba rong Admiral Essen aser submarine Krasnodar nungi Kalibr cruise missile akha aser target ajak nung kongshiogo, ta Russia defence ministry ajanga ashi.
Iba missile khaloktsütsü asoshi mapang shidak nung US, Turkey aser Israel mitkartem nem osang agütsü.
Assad indang tembar, Iran aser Turkey den külemi Syria anülulen ‘de-escalation zone’ tem amenloktsü asoshi sorkar anema nokdaker telungpur den raratsü tezüngzüktep ka Russia-i tan ita agitepa lir.