Syria nung ozüng alema inyakba ken o bushisüngdangtsü telok tenteter

United Nations, December 22 (Agencies): Syria nung tongpang rarartemi tongpang raradang alima temzüng ozüng alema aser nüburtem nem agütsüba temeten anema inyakba ken o bushisüngdanga, kasaji angadangtsü atema telok balaka tentettsü telemtetba ka United Nations Security Council (UNSC)-i tanü, Brehostibar nü agiogo.
Syria tongpang bushisüngdangtsü tentet tentettsü onükji UNSC nung züngsemba linük 105 tashi agizüktsü mulunga liasü, linük 15-i magizüktsü lemtet aser linük 52 tashi shilem magi süidaktsü.
Tan tentettsü renemba tenteti UN Syria Commission of Inquiry (UNSCI) den amalitepa par mapatong inyakdaktsü renemogo.
“Alima tesem balala nung tongpang rarartemi par tongpang raradang ozüng alema inyakba maitsüba aser aibelener nem ozüngi melaba ama tapet temerenshi magütsüba ajanga ozüng alema inyak aka, temerenshi kecha magutsü ta aikati tangatetba ayutsü tenzükogo,” ta Liechtsenstein’er UN Ambassador, Christian Wenaweser-i UNSC telemtetba agiba jakdang sangoktsü.
Tentet tasenba nung züngsemertemi tongpang raradang ozüng alema inyakbaren bushisüngdangba sülen alima, national, regional aser iba amala tapet okadak ozüng alema inyakba keno takok ngua benoka angadangtsü maparen inyaktsüsa nungdakba maparen inyaktsü.
Ano külen, tentet tasenba den ozüng alema inyakba osangtsüsang lemsateptsü atema UN-ia alima linüktem, lokti tentet balala aser tongpang rarar telok ajunga ayongzükogo.