Syria nung ‘rocket’ agi nisung 14 kahset

Damascus, September 20 (Agencies): Syria anüdoklentip tsütsü Aleppo yimti nung Deobar nü telungpuri sorkari amokbanga aliba district tem nung rocket amshia amak dang tajemba agi nisung 14 asü aser 25 yiru, ta state news agency SANA- ajanga metetdaktsüogo.
Bani Zaid tesem nung atsükoka alir, item telupur yagi Aleppo anülulen sorkari amokbanga aliba Midan tesem nung rocket aika kahloktsü, ta SANA osang ajanga ashi.
Syrian Observatory for Human Rights-i, item tasür rongnung tanur-a pongu densema liasü, ta ashiba mapang parnoki, tasürji taliba akütsü kechiba süra yirur alirtemji karbo tasü taküm tsüngda lir, ta shisem.
Aleppo tesem nung iba ama lendong aiben ataloker. Aleppo ya Syria nung yimti tulu rongnung tanabuba lir koba anüdoklen tsütsü telungpur aser anülulen sorkari ta amokbanga lir.