Syria nung Russia sepaitem ajema akümtsü

Moscow, January 06 (Agencies) : Tayimtsü abenba rong “Admiral Kuznetsov” mezüngsür Syria nung aliba Russia nunger sepaitem ajemtsü asoshi onoki sentong ka yangluogo, ta Russia armed force nung tekolakbai ashi.
“Russia Federation Armed Forces nung Supreme Commander, Tir Vladimir Putin-i tetyuba agütsüba ama Syria nung aliba Russia sepaitem ajema akümtsü asoshi Defence Ministry-i inyakyim tenzükogo,” ta Army General Valery Gerasimov-i ashiba Tass news agency osang ajanga metetdaktsü.
Gerasimov-i, Mediterranean tzüyim nung aliba Russia meyong navy rongtem rongnung tayimtsü abenba Admiral Kuznetsov rong mezüngsür iba tesem toktsür meyipa arutsü, ta ashi.
Iran aser Turkey den ceasefire akatsü mulungtepba sülen Russia Tir-i Syria nungi par sepaitem tesadang ka linüki meyipa arutsü ozüng agütsü.
Pai, iba inyakyim ajanga Middle Eastern linük nung küm trok raraba anentsü maongka angutsü, ta ashi.
Russia nunger sepaitemi Syria toktsüba mapang Damascus-i pelaba metetdaktsü.
“Russia Air Force-i onok nungita yariba ajanga takok tulu nguogo aser ibaji ajanga ceasefire tenzüktettsüsa lenmang lapokba tang masü saka Syria nung yimten tebilemtsüa anisüngzük tensa kati arutsü,” ta Russia news agencies osang ajanga metetdaktsüba ama Syrian armed forces nungi Lt. General Ali Abdullah Ayyoub-i metetdaktsü.