Syria nung security force parnok 42 tepset

Damascus, February 25 (Agencies) : Honibarnü Homs anüolen tsütsü aliba yimti nung telungpurtemi prangpong aser taküm bendanga agütsürtemi Syria security office ana amakba mapang security ketdangser tejen ka dena parnok nisung 42 tepset, ta rara asadangba telok kati metetdaktsü.
Honibar anepdang nungi amakba mapang item telungpur jagi yimti nung aliba military headquarter ka nung tekolakba den sepai 29 tepset aser state security telen office ka nung nisung 12 tepset, ta Syrian Observatory for Human Rights sangdong ka ajanga metetdaktsü.
Security office temji al-Ghouta aser al-Mohata district tem nung liasü aser taküm bendanga agütsür pei temang nung tapoktsü alenloker aliba nisung asemi bomb mepokloktsü tsüngda prangpong agi khaa liasü, ta Syria TV osang ajanga metetdaktsü.
Iba lendong nung military security telen nung tekolakba, General Hassan Daaboul dena sepai 32 kahset, ta TV osang ajanga ashi.
Jihad telok, Tahrir al-Sham-i, taküm bendanga agütsür nisung pungui bomb pokloktsütsü liasü saka asem ang apok, ta iba lendong parnoki agütsü ta metetdaktsüba mapang ashi.
“Taküm bendanga agütsür nisung pungui Homs nung aliba state security aser military security telen ana amak….tsüngrem dang kanga pelar,” ta kiralongrartemi Telegram social network ajanga sangdong ka nung metetdaktsü.
Tahrir al-Sham telok ya taküm küm tetenzüklen tentetba telok ka lir. Parnok ya 2016 küm global jihadist nungi pakzüka maodang Nusra Front aser al Qaeda Syria telen ta jaa aliba teloktem nungi adenshia akümba lir.
Telok kümtetba sülen Tahrir al-Sham-i Free Syrian Army (FSA) aser Syria anüdoklentip tsütsü anüolen aliba Islamic State teloktem den rara liasü. FSA teloki yimjung ken o jembiba nung adenba ajanga parnoki kanga anemtsü tenzük.
Hokolbarnü Syria anüdoklentip tsütsü anüolen aliba al-Bab tesem amaker Islamic State telungpurtemisa tesüiba mapang nunga Homs makaa lir.
Homs nung aliba district ka dak alaka iba tesem Tir Bashar al-Assad-i aniba sorkar kübok lir. District kaji sorkar anemertemi amanglema lir.