Syria nung yimjung lidaktsütsü asoshi Iran ajungshir: Ban

United Nations, October 06 (Agencies): Tang Syria nung mangatettep ken o tulu adoka tongpang rarabaren anenja par linük nung yimji yimjung tensa lidaktsütsü atema Iran-i tongti shilem agitsü tajungshiba olen ka United Nations (UN) Secretary General, Ban Ki-moon-i yashi Hombar nü metetdaktsüogo.

Ban-i Iran Foreign Minister, Javad Zarif den yashi ajurutepa senden ka amendang pai iba olenji metetdaktsü.

“Mitkar tashi amshia tongpang raraba ajanga Syria’er mangatettep ken o mebentettsütettsü. Anungji, Syria nung yimtenren tebentetbaren bener arutsütsüsa Iran-i tongti shilem agitsü ajungshir,” ta Ban-i nenshia ashi.

Tang UN-i yimjung bener arutsütsü asoshi maparen tenzüka aliba Yemen linük den sentakba onüka lenir anati yashi benokba osang jangjaogo.

Iran-i Yemen sorkar anemba Houthi telok pusemba yong Yemen’er mangatettep ken o bentetja par linük nung yimji yimjung lidaktsütsü maparen nung Iran-i tongti shilem agitettsü ta Ban densema alima linük lenirtem indang tangatetba lir.

Alima tashi abenba linük lenirtem aser Iran nati taküm July ita agiba nuclear tezüngzüktep mapa küma inyaktsü tajungshiba olena Ban-i yashi metetdakja liasü.

Ano külen, Syria aser Yemen na nung mangatettep ken o tulu adoka tongpang raraba ajanga nüburtem nem timtem toushi bener arutsüba den sentakba onük benoka jembitsü nükjidong nung UN Deputy Secretary General, Jan Eliasson-ia tan Deobar nü Tehran semdangtsü sentong renemba osang ka par otongdar, Stephane Dujarric-i tanü metetdaktsüogo.

Riyadh yimti bushia tanü aosang, Eliasson-i tan Hokolbar nü Abu Dhabi yimti semdangba sülen tan October ita 11 nü Tehran tonga aotsü aser idakji nungi Istanbul yimti bushia tan October 13 nü aotsü sentong renema lir ta lai ashi.

Ano, sangküm 2016 küm May ita amentsü ayongba Humanitarian Summit senden asoshi terenemshiba agitsü senden nung shilem agitsü asoshi Eliasson-i tan October ita 14 nü Geneva-i aotsü sentong renemogo.