Syria nung yimjung sangdonger mezüng anogo tenet nung nisung 135 süogo

Cairo, March 6 (Agencies) : Syria tesem kar nung February 27 nü nungi yimjung sangdonger mezüngbuba anogo tenet nung tajemba agi nisung 135 shi süogo, ta Honibarnü Syrian Observatory for Human Rights (SOHR) ajanga metetdaktsü.
London nung aliba NGO telok kati ashiba agi, tasür rongnungji sorkar anemer Islam telok balala nungi parnok nisung 45 aser public 32 densema lir. Public 32 rongnungji tanür tenet aser tanur tetsü tenet dena lir.
Syrian regime aser National Defence nungi nisung 25 iba tasür rongnung lir aser iba den külemi Syria nung aliba Al-Qaeda den sentaktepa aliba telok People’s Protection Units, Nusra Front aser Islam telok balala nungia nisung 33 item anogo tenent nüng asüba rongnung dena lir.
Tasür timba ka anüng nungi tayimtsü agi amakba mapang aser February 27 nungi March 4 tashi atalokba raratem nung asü. Item amakba aser rara ya Syria nung yimjung alitsü sangdonger aliba Damascus tezülen aliba Latakia province, Western Ghouta, Eastern Ghouta aser Aleppo province anüdoklentip tesemtem nung atalok.