Syria nung yimtenren temelenshi nungdaker: Obama & Putin

Antalya, November 16 (Agencies): US Tir, Barack Obama aser Russia Tir, Vladimir Putin nati Turkey kübok Antalya yimti nung yashi, Deobar nü ajurutepa senden amenba osang jangjaogo.

Yashi, Deobar nü nungi tenzüka Antalya nung G-20 Economic Summit senden amenba jakdang lenir anati ajurutepa yashi jurila senden amen ta White House-i osang jangjashitsü.

Yashi senden nung küm 5 tejaklen nungi tenzüka Syria Tir, Bashar al-Assad-i aniba Syria sorkar aser sorkar anemer na tsüngda mangatettep tulu adoka tongpang raraba anentsütsü asoshi United Nations (UN)-i ayonger par telok ana tsüngda yimjung tezüngzüktep agitsü aser par yimtenren inyakyim nung temelenshi agidaktsütsü asoshi Syria ajunga ajungshitsü onüktem lenir anati benoka jembiba osang jangjaogo.

“Tawa Austria kübok Vienna yimti nung senden anaben tashi amenertemi Syria nung yimji yimjung tia lidaktsütsü asoshi tongti mera agiba onüka lenir anati yashi benoka jembia liasü,” ta Putin’er foreign affairs advisor, Yuri Ushakov-ia tanü metetdaktsü.

“Russia mitkartem densema, alima linüktemi Syria nung tentetba Islamic State (IS) kiralongrar telok meshi meshia samatsütsü maparen nung tongti shilem agiba atema pelaba olen ka metetdaktsür,” ta Obama-i yashi Putin den lemsatepa liasü.

Ano, Ukraine anüdoklen raratepbaren anentsü asoshi Ukraine sorkar aser sorkar anemer na tsüngda agiba yimjung tezüngzüktep mapa küma inyaktsü asoshi Russia-i nungdakba maparen inyaktsü tajungshiba olen ka Obama-i yashi metetdaktsüogo.