Syria nunger million 5 linük toktsür jenogo

Rome, March 31 (Agencies) : Syria nung civil war adokba sülen nungi linük nübur parnok nisung million 5 dak tali pei aliba tesem aser linük toktsür kidanger linüktem nung jenoka lir, ta UN refugee agency UNHCR aser Turkey sorkar na data nung lir.
Turkey, Lebanon, Jordan, Iraq aser Egypt linüktem nung nisung 5,018,168 shi jenoka lir, ta Turkey osangkaket ajanga metetdaktsü.
Yaküm December ita nung Aleppo anüdolentip tsütsü aliba yimti nung Syria sorkar aser parnok den lokteper aliba Russia nungertemi takok anguba ajanga sorkar anemertem tali jashir, ta kasa osang nungji shia lir.
Ano nisung million aika Syria tesem balala nung jenshia lir. March ita nunga nisung meyirjang aikasa jenaogo aser item rongnung tetsürtem aser tanurtem timba lir shirnok Hama nung sorkar anemertemi amakdang ajen.
Syria nungertem ya ano Europe nunga jenoka lir. April 2011 nungi October 2016 tashi nung Europe nung jenoker Syria nunger nisung 884,461 liasü. Parnok rongnung asemsü lemer anasüji Germany mesüra Sweden nung liasü, ta data ajanga sayu.
“Refugee tem atema tejenokdak ulushiba mapaji kanga temela masü aser alizüng atongtsü ano talangka lir,” ta Brihostibarnü UNHCR nung tekolakba Filippo Grandi-i ashi.
Refugee million 1.2 atema tejenokdak tesem nüngdaka lir aser item rongnung shilem 40 bo Syria nungertem lir ta UNHCR-i asadangteta lir.