Syria nunger tetsür chanu kati Donald Trump dangi shidi ka zülu

January 26, 2017 (Agencies): Arishi küm 7 tain, Bana Alabed-i US Tir Donald Trump dang Syria nung aliba tanurtem yaritsü asoshi mepeshia shidi ka zülu.
Bana aser lar kibong yaküm December ita nungi Turkey nung oa jenoka lir.
“Syria nung aliba tanurtem nür tanurtem ama lir, aser yimjung nung alitsü asoshi dalang. Syria nung aliba tanurtem asoshi nai langka inyaktsüla,” ta Bana-i la shidi nung zülua lir. Bana tetsüi ashiba agi, lai iba shidi Trump Tir menden nung amentsüba anogo ka lia zülu, ta osang ajanga ashi.
“Ni rara nung kangshiba Syria nunger tanur rongnung ka lir,” ta la shidi nung zülusem. Aleppo nung lar school bomb agi poksatsü, aser lar medemertema karbo süogo, ta lai Trump dang ashi.
“Tangbo ni Turkey nung jangratema lidar. Ni school-i ao metenzük, saka ni school-i otettsü, saka Syria tesem balala nung tanur million aika ni ama kangshidar. Yimjungji na dena ajak asoshi tongtibang,” ta lai zülu.
“Nai Syria nung aliba tanurtem yaritsü nangzükra na kü medemer tasen ka kümogo,” ta Bana-i maneni Trump den medemer kümnüa zülu.
Tir Bashar al-Assad yimsüsüba aser iba anemer na tsüngda küm 6 rara nung nisung 300,000 dak tali süogo aser iba rongnung 15,000 shibo tanurtem lir.