Syria nungi India nunger pezü kümzükogo: Sushma Swaraj

New Delhi, April 03 (Agencies): Rara aliba linük, Syria nungi India sorkari India nunger pezü kümzükogo, ta Deobarnü External Affairs Minister, Sushma Swaraj-i twitter ajanga metetdaktsü.
Laisa, “Syria Deputy Ato kilonser (Fahd Jassem al-Freij)-i taküm January ita nung India semdangba mapang ni pa dang parnok chioktsü atema mepishia liasü,” ta ashi.
Syria nungi kümzükba India nunger pezüji- Arun Kumar Saini, Sarvjit Singh, Kuldeep Singh aser Joga Singh nunger lir.
NDTV osang ka ajanga ashiba agi, taküm January ita nung Syria sorkari India nunger pezüji pua liasü. Parnokji kiralongrar telok, ISIS nung adentsü atema aoer liasü ta parnoki (Syria) melung melemteti liasü.
India nunger pezüji Jordan adener Syria-i aitba mapang Damascus nung Syria sorkari apu. Ajisüaka tesülenbo parnokji ISIS pusemertem masü, saka ozüng alema kaket shitak makai linük telungi aitertem liasü ta jangjaogo.
Honibarnü Saudi Arabia nung India Ato kilonser, Narendra Modi-i cabinet züngsem, Sushma Swaraj tenüng sanga, “Ozü External Affairs Minister Sushma-i alima tesem mashii ka nung sensotemi timtem ajuruba ajak atema nendaka inyaker. Alima tesem mashii ka nung India nunger ka timtem ajurura ozü sorkari akokba tashi agi yarir,” ta ashi.