Syria nungi mitkartem anir aotsü Trump-i lemtet, Putin-i pela agizük

Moscow, Luchii/Dec. 20 (Agencies): Syria nung ISIL madak takok anguba sülen mitkartem kidangi meyipa yoktsü US Tir Donald Trump-i lemtetba Russia Tir Vladimir Putin-i pelashishia agizükogo.
“US-i mitkartem anir aotsü lemtetba ya tim lir,” ta Putin-i Yangtepnü osangbener senden ka nung ashi.
Trump-i, US mitkartem ajunga Syria nungi anir aotsü aser Islamic State of Iraq and the Levant (ISIL, shirnok dang ISIS ta ajar) telok madak takok nguogo, ta Rasemnü sangdonga liasü.
Russia tiri, IS madak takok anguba aser US tiri ashiba nung nia mulunga agizüker aser Syria nung IS anema kanga sashia raraogo, ta ashi.
Trump-i maitkartem ajunga anir aotsü telemtetba agiba ya US ketdangsertemia jangjashitsü aser iba maparen ya taruba ita nungi tenzüktsü imlar.
Yamaji süaka Washington sentong nung tamang makai Putin-i, “US mitkartem meyipa aoba tang tashi mangur, saka ibai takoktsü südi ta imlar,” ta ashi.
Yangtepnü Tweet ka nung Trump-i, Syria nungi US mitkar 2,000 shi agientsü lemtetba ya ajungba agiba masü aser iba mapa ya tekeratiba nung inyakner, ta ashi.
Iba sülen paisa Tweet ka nung US-i Middle East nung shilem agiba asüngdang aser tangartemi raratsü mapang lir, ta ashi.
Trump-i ISIL madak takok nguogo ta sangdongaka item telungpurtemi maneni lendong agütsür, ta France aser UK ketdangsertemi ashi.
“Ano mapa aika anüngzüka lir aser parnok ajanga timtem agütsütsü aliba asenoki mangu medoktsütsüla. Litsü meliaka Daesh (ISIL) ya lendong ka ama alitsü,” ta UK Foreign Office ajanga Rasemnü sangdong ka nung metetdaktsü.
“United States-i jangja jangja ashiba ama, Syria nung iba maparen tasenba ajanga Global Coalition mesüra iba indang campaign metembangtsü. Iba wadang nung takok angutsü asoshi onoki Coalition züngsemtem den külemi inyaktsü,” ta parnokisa ashi.
Saka Syria nung iba telok madak takok nguogo ta Trump-i sangdongba ya British junior defence minister Tobias Ellwood-ibo magizükteter ta shiogo.
“Item telok ya tanga telok den meyoktepa lir aser lendong ya kangadang taküm lir,” ta Ellwood-i ashi.
France defence minister-ia, ISIL tem tashi maitba kümogo saka takok bo makok, ta Yangtepnü ashi.
“Islamic State (ISIL) ya taoba mapang dang nungi tashi maitba kümogo. Saka Islamic State ya map nungi mesamatsü aser parnok tera memakep. Kiralongra telok ajunga sepaitemi akoktsüla,” ta Florence Parly-i Twitter nung zülutsü.
France indang European Affairs Minister Nathalie Loiseau-ibo, France mitkartem tang atema Syria nungsa alitsü, ta ashi.
“Coalition-i Syria nung takok ngua raraba ya ochi lir, saka iba rara manen aser onoki maneni raratsü,” ta lai CNews television dang ashi.
Israel Ato Kilonser Benjamin Netanyahu, shiba Iran nungertemi iba tesem nung shilem agiba indang süoki ia bilemer, paibo, Syria nung Iran nungertem den sendaktepa aliba telok den Iran-i tesashiba nung raratsü, ta ashi.
US-i iba linük nungi ainshiba ajanga Syria sorkar asoshi nungita yarir tashi tulutem ajema akümtsü ta Israel-i khuret abener.
Syria nung Iran nungertem aliba aser Lebanon nungi Hezbollah telungpur telok nem raraba hadir agütsüba anema Israel-i tayimtsü amshia raraka Moscow-i mangu amai yutsür.
Syria rara nung US aser Turkey tesendaktek mekonga aküm, kong ISIL den raratsü asoshi US-i Syrian Kurdish YPG telok yari.
Turkey-i YPG ya kiralongrar telok ka aser parnok ya Kurdistan Workers Party ama züngshir.