Syria rara nung lendong tulu keta lir : Antonio Guterres

Geneva, January 18 (Agencies) : Syria nung civil war nung lendong ulura keta lir aser iba ya tangatettep kati marutsü ama tsübua bilemer, ta UN Secretary General-i ashi.
January 1, 2017 nü UN Secretary General menden melenzüksang Antonio Guterres-i ashiba agi, civil war ajanga Middle East nung tensa mejungi kümdaktsüogo aser alima tesem balala nung kiralongraba mapa inyakogo.
“Syria civil war ya nisung ajak atema lendong tulu ka lir” ta Guterres-i United Nations, Geneva nung osangbener dang ashi.
Taruba Hombarnü Kazakhstan yimtiba Astana nung Syria nung rarar telok anaprong tsüngda yimjung olemtep alitsü sentong lir aser iba ya Damascus den yariteper Russia aser opposition pusemer Turkey nati ketdangsüa ayongba lir.
Iba yimjung olemtep ajanga ceasefire alitsü aser tensa tajungba akümtsü imlar, ta UN tanishirisa metetdaktsü.
Geneva nung yimjung maparen ya Guterres atema Syria envoy Staffan de Mistura lenisüba kübok inyaker aser pai February 8 nung maneni olemtep tenzüknür.
Guterres-i tan agi tanabenbubua secretary general ka ama Geneva semdanger. Iba yimti nung küm 10 shi ka pai UN indang refugee agency nung tekolak ama inyakogo.