Syria: SDF mitkartemi yimtsüng 9 tashi agiogo

Raqqa, June 01 (Agencies): US mitkartemi nungitba Syrian Democratic Forces (SDF) mitkartemi Syria kübok, Turkey arrtsülen tentetba yimtsüng 9 tashi Islamic State (IS) kiralongrar ket nungi tanaben agishiba osang jangjaogo.

US mitkartemia par tayimtsü amshia, Turkey arrtsülen tentetba aser IS teloki agia aliba Manbij jila ghonda 24 tejaklen nungi tenzüka amakba sülen idakji alir nisung 15 tashi tepsetba osang ka nübur temeten asoshi nokdakba tentet, Syrian Observatory for Human Rights (SOHR)-ia metetdaktsüogo.

Kurd kini tentetba sepaitemi aniba teloktep mitkar telok, SDF-i US’er special forces mitkar züngsem 200 den aroki lokteper külen Euphrates ayong tzüyimkümlen tesep tentetba IS telok mita parnok amakba maparen takok ngua inyaktsü tenzüka lir.

Ajisüaka, Kurd kin-i Turkey arrtsülen par state balaka tentettsü meranger ta temulung melemi bilema, Turkey sorkari tan IS telok anema raraba maparen aitsüba olen ka metetdaktsüogo.

IS telok nung züngsema par telok tenüng nung tongpang raratsü jangrartemi pei talidak toktsür IS tesep bushia aodak tongti ka aliba yong US-i Manbij aser Manbij temeket tesem ajunga IS ket nungi tanaben agishitsü asoshi tan par mitkar mapatongji tenzüka lir.

IS teloki par tesepti tentetdak, Raqqa anüdoklentip tsütsülen tentetba yimtsüng aika SDF telokisa IS ket nungi taoba May ita agishiba osang bushitetogo.