Syria sepaitemi kiralongrartem aliba yimti ka meyipa agiogo

Beirut, January 24 (Agencies) : Latakia province nung sorkar anemertemi amanglemer aliba yimti tongtibang ka, Bashar al-Assad-i aniba Syria sepaitemi meyipa agiogo, ta state television ajanga metetdaktsü.
Sepai sangdong ka ajanga,  Syria sepaitemi popular defence (militia) den lokteper Rabia jila ya meyipa agi, ta ashiba state television ajanga metetdaktsü.
Iba jila ya 2012 küm nungi opposition teloki amanglemer liasü aser Al-Qaeda nungi jakzükba Al-Nusra Front telok den sorkar anemer telok balala kübok liasü.
Syrian Observatory for Human Rights-i ashiba agi, Rabia jila ya Deobar aonung sepaitemi lungbanger agi.
“Tesüiba gondha 48 nung sepaitemi iba jila nung alir nisung 20 apu aser iba sülen tesem asemsü len nungi lungbang-(anüolentip, anüolen aser anüdoklentip),” ta Observatory telok nung tekolakba Rami Abdel Rahman-i AFP osangbensertem dang ashi.
Syria aser Iraq dena alima rangben nung ISIS-i kiralongraba tatembang kati arur asütsü ta imlar.
Mansab Abdel Rahman-i, Russia sepai nung ketdangsertemi Rabia ya nükpeta liasü aser parnoki anüng nungi amakba ajanga iba tongpang nung takok tulu nguogo,” ta ashi.
Rabia meyipa agiba ajanga sorkari parnok anemertem Turky arrtsülen nungi kechisarena belenba lenmang temesüba kümdaktsür, ta pai shisem.
January 12, 2016 küm Salma agiba sülen tang Rabia agirba lir.