Syria sorkar anemer teloki yimjung senden nung shilem agir

Geneva, February 02 (Agencies): Syria Tir, Bashar al-Assad-i aniba Syria sorkar anemer tongti telok, High Negotiations Committee (HNC)-i United Nations (UN)-i ayonger taoba hopta nungi tenzüka Switzerland kübok Geneva yimti nung amenba Syria yimjung senden nung yashi, Hombar nü shilem agiba osang jangjaogo.

HNC teloki UN’er Syria envoy, Staffan de Mistura den yashi ajurutepa senden mena liasü.

Ajisüaka, par teloki Syria sorkar telok denbo tsüngdong ajurutepa yimjung senden amentsü memelungi lir.

Taoba küm 5 tejaklen nungi tenzüka mangatettep adoka tongpang rarabaren anenja Syria nung yimji yimjung lidaktsütsü asoshi Geneva nung senden amendang, Syria nungbo chiyongtsü aser mozü mora peria mongui nisung 8 tashi yashi asüba osang jangjaogo.

Syria sorkar mitkartemi agia aliba aser parnoki tanaben agishitsü merangba jila aser yimtitem nung alirtem nem nungdakba chiyongtsü aser mozü mora teyari agütsütsü nangzükba sülen ang par teloki Assad-i aniba Syria sorkar telok den yimjung senden amentsü lemtetba osang ka HNC teloki metetdaktsüogo.

2011 küm March ita nungi tenzüka Syria nung tongpang kanga sashia raraba ajanga nisung 260,000 dak tema tepsetba aser nisung million aika pei talidak toktsütsüsüa akümba sülen tan amenba yimjung senden ya yimjung senden tulutiba ayonga amener lir.

Syria sorkar aser sorkar anemer na tsüngda yimjung tezüngzüktep agia par telok anati aroki lungjemer teloktep Syria sorkar tentettsütsü nükjidong nung UN-i tan senden ayongba osang jangjaogo.