Syria sorkar anemertemi sorkar anema raratsü amokmerener

Damascus, April 18 (Agencies): Free Syrian Army (FSA) densema, Syria sorkar anemer telok ishikati Syria sorkar mitkartem anema tongpang raratsü amokmerenba olen ka tanü, Hombar nü sangoktsüogo.

Syria sorkar aser par telok pusemertemi taküm February ita agiba yimjung tezüngzüktep anema inyakba yong parnokia sorkar anema raratsü renemba osang ka sorkar anemertemi tanü metetdaktsü.

Syria sorkar aser sorkar anemer na tsüngda yimjung tezüngzüktep agiba sülen nisung meyirijang jenti asüdak aser nisung million ka dak temai toktsür bendanglen jenokba Syria linük nung tongpang rarabaren kanga dang ajema aküma osang bushiteta lir.

Ajisüaka, taoba hopta ishika tejaklen nungi tenzüka sorkar, IS kiralongrar aser sorkar anemertem raradak, Syria anüdoklentip tsütsülen, Aleppo province nung taoba mapang ama tongpang raratsü tenzükba osang bushitetogo.

Ano külen, Syria-i yokba United Nations special envoy, Staffan de Mistura-i ayonger külen, Syria sorkar aser sorkar anemertemi taoba hopta nungi tenzüka Switzerland kübok Geneva nung yimjung senden tanaben menshiba osanga jangjaogo.