Syria sorkar tayimtsütemi 27 tepset: SOHR

Damascus, August 12 (Agencies): Syria sorkar mitkartemi par tayimtsü amshia Damascus anasa tentetba tesemtem nung bomb tsükdakja amakba lendong tulu atalokdaktsüba osang ka nübur temeten asoshi nokdakba tongti telok kati tanü Bodbar nü metetdaktsüogo.

“Syria mitkartemi par tayimtsü amshia Damascus yimti anasa tentetba jilatem, Douma, Saqba, Kafr Batna aser Hammouriyeh nunger nung bomb tsükdakja lendong atalokdaktsüba ajanga ishiba agi nisung 27 tepsetba aser nisung 120 shi yirutsüba osang tang tashi nung jangjaogo,” ta Britain nung tentetba Syria Observatory for Human Rights (SOHR) teloki ashi.

Sorkar anemertemi Damascus yimti nung rocket 10 dak tema kalokja amakba ajanga ishiba agi nisung 4 shi tepseta lendong atalokdaktsüba nem telangzüba agüja par mitkartemi sorkar anemertemi tesep tenteta aliba tesemtem amakba osang ka Syria’er interior ministry-ia tanü metetdaktsü.

“Sorkar anemertemi rocket ishika kalokja amakba ajanga Damascus kübok tentetba kiyong ishika nung ki o jen jenti raksatsüba den külemi, nisung 4 tepsetba aser nisung 58 shi yiruba osang tang tashi nung jangjaogo,” ta ministry-i osang jangjashitsü.

Ajisüaka, sorkar anemertemi rocket 50 shi kalokja amakba ajanga nübur 4 aser mitkar züngsem 1 densema parnok 4 asüba aser nisung 59 shi yirutsüba osang bushitetba osang ka SOHR-i tanü metetdaktsü.

Sorkar anemertemi Damascus tezülen atsüker külen Damascus nung rocket bomb-tem kalokja mapang shia amakba osang bushiteta lir.

“Ajisüaka, yamaji inyakba ajanga tai maketba nübur jenti tepsetter,” ta shia, nübur alidak rocket kaloktsübaji tongpang raradang ozüng alema inyakba maparen lir ta SOHR-i metetdaktsüogo.

Ano, sorkar mitkartemia sorkar anemertemi agia aliba tesemtem talisa, Eastern Ghouta nung par tayimtsü amshia bomb-tem tsükdakja amakba maparen mapang shia inyakba osanga jangjaogo.

“Syria mitkartemi par tayimtsü amshia Eastern Ghouta nung alirtem tepsetba ajanga tongpang raradang ozüng alema inyakba ken o nung aibelenogo,” ta Amnesty International telokia Syria sorkar aitsüba olen ka tanü metetdaktsü.

March, 2011 nungi tenzüka Syria sorkar aser sorkar anemer na tsüngda mangatettep tulu adoka tongpang kanga sashia raratsü tenzükba ajanga tanü tashi nung nisung 240,000 dak tema asüba aser nisung meyirijang jenti pei talidak toktsür tanga tesemtem nung jenoka alitsüsa akümba osang bushitetogo.