Syria sorkari ayawara tia ajurushiba yimtsüngtem semdangtsü melar

Beirut, January 08 (Agencies): Syria sorkari chiyongtsü peria mongui ayawara tia nung alir yimtsüng 3 nüburtem nem nungdakba teyari agütsütsü melaogo.
Syria Tir, Bashar al-Assad aser pai aniba sorkari ayawara tia ajurushia aliba yimtsüng 3 nem nungdakba teyari agütsütsü melabaren pela agizükba olen ka European Union (EU)-ia tanü Hokolbar nü metetdaktsüogo.
Iba yimtsüng 3 densema, nüburtem aliba tesemtem nung amakba lendong matalokdaksütsü tajungshiba olen ka EU-isa mepishia metetdaktsüogo.
Tan teyari agütsütsü melaba yimtsüng 3 nung chiyongtsü peria mongui aya agi nisung 23 tashi taoba December ita nungi tanü tashi nung asüba osang ka nungdakbapur nem angati teyari agütsüba tentet, Doctors Without Borders (MSF)-ia mtetdaktsüogo.
“Tan asürtem rong nung ita 6 kinüchanu nungi tenzüker arishi küm 60 tain nisung densemogo,” ta MSF-i osang jangjashitsü.
“Sorkari teyari agütsütsü melaba ama, anogo ishika tsüngda nung yimtsüng 3 tonga chiyongtsü aser teyari osettsüset bener aotsü,” ta United Nations’er Resident & Humanitarian Coordinator in Syria (UNRHC), Yacoub El Hillo-ia tanü sangoktsü.
Tan teyari agütsütsü melaba yimtsüng nung densemba Shiite yimtsüng 2 – Syria anüdoklentip tsütsülen tentetba Foua aser Kfarya yimtsüng na nung sorkar anemertemi küm 1 dak tema lendong atalokdaktsüba osang bushitetogo.
Lebanon arrtsülen tentetba Madaya yimtsünga sorkar mitkartemi yaküm 2015 küm July ita nungi tenzüka amakba yong nüburtemi tebang agi meshiteti timtim toushi ajuruba osang bushiteta lir.
“Syria sorkari Madaya, Foua aser Kfarya yimtsüng nung alirtem nem chiyongtsü aser nungdakba teyari agütsütsü melaba atema kanga pelar,” ta Hillo-i nenshia ashi.
Foua aser Kfarya yimtsüng na nung nisung 30,000 dak tema lir aser Madaya yimtsüng nung iba dang nungi nisung timba tang telikdak lir.
“Madaya nübur nisung 42,000 shi chiyongtsü peria mongui aya agi asütsüsa tia ajurua lir,” ta Hillo-i osang jangjashitsü.
Tir Assad aser pai aniba Syria sorkari timtem toushi jenti ajurushia aliba tesem aika nung nungdakba teyari agütsütsü asoshi tanga memelai lir ta paisa shisem.
Ano külen, Syria sorkar aser sorkar anemer na tsüngda yimjung tezüngzüktep agidaktsütsü nükjidong yur par telok ana tsüngda tan January ita tatembanglen Geneva nung senden amentsü ayongtsü asoshi UN’er Special Syria Envoy, Staffan de Mistura-i tanü Damascus yimti tonga aoba osang jangjaogo.
Mistura-i Damascus tonga aoba sülen Syria Foreign Minister, Aymen Sossan den ajurutepa liasü.