Syria sorkari ‘safe zone’ tesem nung bomb pokloktsü:NGOF

Damascus, May 6 (Agencies) : Syria sorkar kübok aliba force temi Homs aser Hama province tem kübok tesem aika nung bomb pokloktsü aser parnoki bomb agi amakba tesem aika Honibarnü ‘safe zone’ ta lemteter ayuba tesemtem dena lir, ta Britain nungi rara asadanger teloki ashi.
Syrian Observatory for Human Rights (SOHR)-i, Syria Tir Bashar al-Assad indang security temi Hama kübok aliba al-Lataminah aser al-Zalaqeyat jilatem nung bomb pokloktsü aser iba jila ana yongtsü nung aliba yimtsüng ka dena bomb jagi amshi, ta ashiba osang ajanga metetdaktsü.
Item tesemtem nung bomb apokba olaji Homs anüdoklentip nungia dena angashia apok, ta ketdangsertemi ashiba mulungtet telok kati metetdaktsü.
Item tesem ya ‘safe zone’ ta telemtetba agir ghonda 11 dang lirbo item bomb apok ajisüaka nisungbo shinga meyiru, ta SOHR-i ashi.
Homs yimti anasa Assad’er sepaitem aser Islamic telok na tsüngda rara adok, saka yiruba mesüra tasüba osangbo kecha maliasü.
Item tesem ya ‘safe zone’ asütsü asoshi Astana, Kazakhstan nung Brihostibarnü telemtetba kati arua jembia ayu aser iba telemtetba nung Russia, Turkey aser Iran linüktemi sign asü.
Item linüktem yagi Idlib, Homs anüdoklentip aser Hama, Ghouta anüdoklen aser linük anüolentip tsütsü aliba tesemtem safe zone asütsü bangjemtep.
Iba tenangzüktepji ita trok asoshi alitsü, ta Russia-i ashi, ajisüaka mulungra ano atsülangshitsü ta shisem.
Syria opposition telokibo iba tenangzüktep magizük, kechiba süra parnoki Iran atema yimjung maparen ajunga anema arur.