Syria: Tongpang meraratsü sangoktsüba sülen 50 shi tepsetogo

ACEC87A1-18D5-4C97-95FA-986C5C2B33F7_mw1024_s_n
Syria: Tongpang meraratsü sangoktsüba sülen 50 shi tepsetogo

Damascus, July 09 (Agencies): Syria nung ghonda 72 tashi tongpang meraratsü osang Syria sorkar mitkar lenirtemi sangoktsüba sülen yashi, Hokolbar nü tashi nung Syria nung ishiba agi nisung 50 shi asüba osang bushitetogo.
Muslim nungeri ita 1 tepiyong agiba lumitsüren tembangba sülen ajaki Eid al-Fitr benjungmong timtem kecha majurui sadoka mongdaktsütsü nükjidong nung Syria sorkar lenirtemi ghonda 72 tashi tongpang meraratsü osangji sangokja liasü saka parnoki sorkar anemertem den tamasa tongpang meraratsü nangzüktep asü menangzüktep iba osangbo parnoki memetetdaktsü.
Yashi Hokolbar nü kisüng nung Turkey arrtsülen, Idlib province aser Aleppo yimti anüdoklentip tsütsülen densema, Syria kübok tesem 2 tashi nung tongpang raraba ajanga nisung asüba osang jangjaogo.
Idlib province kübok Darkoush yimtsüng nung tayimtsü nungi pokshitsü oset tsükdakja lendong atalokdaktsüba ajanga tila tanur 2 densema, ajak agi nisung 23 tepsetba osang ka nübur temeten asoshi nokdaker tongti tentet, Syrian Observatory for Human Rights (SOHR)-i metetdaktsü.
Ajisüaka, yashi amakba lendongji Syria sorkar asü Russia mitkartemi anishiba tayimtsü amshia atalokdaktsü iba osang tang tashi mejangjateti lir.
Idlib province ya al-Qaeda telok den sentaktepba Nusra Front-i amokbangba tongti tesem ka lir.
Ano, Aleppo yimti tezülena tila tanurtem ishika densema, ishiba agi nisung 25 tashi tepsetba osang ka SOHR-i sangoktsü.
Syria sorkar anemertemi mortar bomb amshia Syria sorkar mitkartem amaktsü merangdang nüburtemji tepsetba osang angazükogo.

You must be logged in to post a comment Login