Syria: US-i tayimtsü amshia IS züngsem 100 dak tema tepset

US mitkari par tayimtsü amshia, Syria anüdoklentip tsütsülen, Kobane nung Islamic State (IS) kiralongrartemi tesep tentetba ki ishika poksatsüdang agiba noksa ka yangi angur. (Kobane, May 28)

Ankara, May 28 (Agencies): US mitkartemi par tayimtsü aser Turkey mitkartemi par artillery tongpang oset amshia, Syria anüdoklentip tsütsülen tesep tenteta alir Islamic State (IS) telok amakba sülen par züngsem 104 tashi tepsetba osang ka Turkey sorkari ketdang asüba Anadolu osangi tanü, Honibar nü metetdaktsüogo.
Syria kübok IS teloki agia aliba tesem nungi rocket ishika arrtsü adena Turkey arrtsülen, Kilis nung kalokja nisung 5 shi yirutsüba sülen teloktep US aser Turkey mitkartemi IS telokji yasüng, Hokolbar aonung amak ta osangi ashi.
Tan amakdang IS teloki par tesepti ama amshiba ki 7 tashi US mitkar tayimtsütemi poksatsüba osanga jangjaogo.
Taküm 2016 küm tenzüker tanü tashi nung IS teloki missile aser rocket amshia, Syria nungi arrtsü adena amakba sülen, Kilis nung alir nisung 21 tashi tepsetba osang bushiteta lir.
Tan May ita tetenzüklena Turkey mitkartemi arrtsü adena pokshitsü tongpang oset kalokja amakba ajanga IS kiralongrar 55 tashi tepsetba osang bushitetogo.
Ano külen, IS teloki Aleppo province nung US-i nungitba Syria sorkar mitkartem den yasüng nungi tenzüka tanep tashi tongpang kanga sashia raraba osanga angazükogo.