Syria yimjung senden amajok nung amener: Erdogan

Lima, February 04 (Agencies): United Nations (UN)-i ayonger Geneva nung amenba Syria yimjung senden amajok nung amenba olen ka Turkey Tir, Tayyip Erdogan-i yashi, Bodbar nü metetdaktsüogo.

“Syria Tir, Bashar al-Assad-i aniba Syria sorkar aser Russia nati par mitkar tashi amshia Syria nung amakba maparen inyak tashibo Syria yimjung senden amenba ajanga yimjung bener marutsütettsü,” ta Erdogan-i sangoktsü.

“Russia-i Syria nung nisung tepsetba maparen teinyakdak aliba mapang ka nung yimjung senden takok ngua mentetti ma? Mitkar tashi amshia amakba maparen inyak tashibo Syria nung yimji yimjung bener marutsütettsü,” ta Erdogan-i Peru kübok Lima yimti nung ayongba shishilembatsü senden ka nung o jembidang ashi.

Ano külen, Geneva nung ayonga amenba Syria yimjung senden hopta 3 shi thinentsü lemtetba osang ka UN’er Syria envoy, Staffan de Mistura-ia yashi metetdaktsüogo.

“Russia mitkar tayimtsütemi nungitba Syria sorkar mitkartemi Syria kübok Aleppo anüdoklentip tsütsülen sorkar anemer anema raraba aser Turkey nungi yokba nübur yaritsü osettsüset Aleppo tonga bener modaktsüi nokdangbaren anenba sülen ang Syria yimjung senden maneni amentsü lemtetogo,” ta Mistura-i metetdaktsü.

Turkey ya Assad-i aniba Syria sorkar anemertem nungita yarir tongti linük lir aser Assad Syria Tir menden nungi matsüngdok tashibo Syria nung yimji yimjung melitettsü ta Turkey-i metetdakja lir.

Russia-i ita 4 tejaklen nungi tenzüka par mitkar tayimtsütem yoka Syria nung raradaktsütsü tenzükba sülen tanü tashi nung tai maketba Syria nübur nisung 1,400 shi tepsetba osang bushiteta lir ta nübur temeten asoshi nokdaker, Syrian Observatory for Human Rights (SOHR)-ia metetdaktsüogo.

Ajisüaka, kiralongrar ajunga mesamatsü tashi par mitkartem Syria nung tongpang raradaktsütsü lemtetba osang ka Russia-ia metetdakja lir.

Syria sorkar aser Russia nati Syria sorkar anemer ajunga kiralongrar ta züngshir.